ᐱᔨᑦᑎᕋᖅᑕᐅᕙᒃᑐᑦ ᐅᖄᓚᕝᕕᖓ: 1-866-710-4200
ᐅᖅᓱᐊᓗᖕᒨᖅᑐᑦ ᐊᐅᓚᐅᑎᓖᑦ ᐊᓯᐊᒎᕋᓱᒃᑎᓪᓗᑕ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐅᓄᖅᑐᓂᒃ ᐱᓕᕆᐊᒃᓴᓂᒃ ᓴᖅᑭᑎᑦᑎᓚᐅᖅᐳᑦ ᐊᑭᓕᖅᓱᐃᔨᑦ ᓇᖕᒥᓂᖅ ᐆᒻᒪᖅᑯᑎᒃᓴᒥᓂᒃ ᓴᖅᑭᑎᑦᑎᔪᓐᓇᖁᓪᓗᒋᑦ ᐊᑐᒃᑲᓐᓂᕈᓐᓇᖅᑐᑎᒍᑦ. ᖃᐅᔨᒋᐊᕈᓐᓇᖅᐳᑎᑦ ᐊᑖᓂ ᖃᓄᖅ ᐱᓕᕆᖃᑕᐅᔪᓐᓇᕐᒪᖔᖅᐱᑦ ᓄᓇᕗᒻᒥ ᓴᓗᒪᔪᒥᒃ ᐆᒻᒪᖅᑯᑎᖃᕈᓐᓇᕐᓂᕐᒥᒃ ᓯᕗᓂᒃᓴᑦᑎᓐᓂ.
ᖃᐅᔨᓴᐅᑎᙳᐊᓕᕆᓂᖅ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓂ ᖃᐅᔨᓴᐅᑎᙳᐊᓕᕆᓂᖅ ᐊᖏᕐᕋᖅᓯᒪᔪᓂᒃ ᐊᑭᓕᖅᓱᐃᕙᒃᑐᓂᒃ ᐊᒻᒪ ᐊᑕᐅᓯᕐᒥᒃ ᕼᐋᒪᓚᒃᑯᓐᓂ ᓈᓴᐅᑎᓕᖕᒥᑦ ᐊᑐᓂ ᓄᓇᓕᖕᓂ ᓇᖕᒥᓂᖅ ᐆᒻᒪᖅᑯᑎᒥᓂᒃ ᓴᖅᑭᑎᑦᑎᔪᓐᓇᖁᓪᓗᒋᑦ ᐊᑐᒃᑲᓐᓂᕈᓐᓇᖅᑐᓂᒃ ᐊᒻᒪ ᐃᓚᓕᐅᔾᔭᐅᓗᑎᒃ ᐆᒻᒪᖅᑯᑎᓕᕆᔨᒃᑯᑦ ᐅᐊᔭᖏᓐᓄᑦ.
ᑮᓇᐅᔭᓕᐅᕋᓱᖕᓂᖅ ᐊᒻᒪ ᐱᓕᕆᕝᕕᖕᒥ ᐆᒻᒪᖅᑯᑎᑖᖅᑎᑦᑎᕙᒃᑐᑦ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑮᓇᐅᔭᓕᐅᕋᓱᖕᓂᕐᒧᑦ ᐱᓕᕆᕝᕕᖕᒥᓗ ᐆᒻᒪᖅᑯᑎᑖᖅᑎᑦᑎᕙᒃᑐᑦ ᐱᓕᕆᐊᖓᑦ ᑐᕌᖓᓪᓗᐊᑕᖅᑐᑦ ᑮᓇᐅᔭᓕᐅᕋᓱᐊᕐᕕᖕᓄᑦ ᐊᒻᒪ ᐱᓕᕆᕝᕕᖕᒥ ᐊᑭᓕᖅᓱᐃᔨᓄᑦ. ᑖᓐᓇ ᐱᓕᕆᐊᖑᔪᖅ ᐊᑭᓕᖅᓱᐃᔨᓂᒃ ᐊᑐᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᑖᖅᑎᑦᑎᔪᓐᓇᕐᓂᐊᖅᐳᖅ ᓇᖕᒥᓂᕆᔭᒥᓂᒃ ᓂᐅᕐᕈᑎᖃᕈᓐᓇᕐᓗᓂᓗ ᑕᒪᐃᓐᓂᒃ ᐆᒻᒪᖅᑯᑎᓕᐊᖑᕙᓪᓕᐊᔪᓂᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ.
ᐃᒻᒥᒃᑰᖓᓪᓗᑎᒃ ᐆᒻᒪᖅᑯᑎᑖᖅᐸᓪᓕᐊᕙᒃᑐᓄᑦ ᐱᓕᕆᐊᖑᔪᖅ
ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐋᖅᑭᒃᓱᐃᓕᖅᐳᑦ ᓴᖅᑭᓵᓕᓛᓕᖅᑐᒥᒃ ᐃᒻᒥᒃᑰᖅᑐᑦ ᐆᒻᒪᖅᑯᑎᑖᖅᑎᑦᑎᕙᒃᑐᑦ ᐱᓕᕆᐊᖓᓂ ᐆᒻᒪᖅᑯᑎᓕᐅᖅᑎᓂᒃ ᐆᒻᒪᖅᑯᑎᓕᕆᕝᕕᐅᑉ ᓯᓚᑖᓂ ᓄᑭᓪᓚᐅᑎᒧᑦ ᐆᒻᒪᖅᑯᑎᖃᖅᑎᑦᑎᔪᓐᓇᖅᑐᓂᒃ ᐊᓯᐊᒍᑦ ᐆᒻᒪᖅᑯᑎᓕᕆᔾᔪᑎᓂᑦ ᓂᐅᕐᕈᑕᐅᕙᒡᓗᑎᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᓪᓚᑦᑖᖅ.