ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖓᑦ (QEC) ᐆᒻᒪᖅᑯᑎᓄᑦ ᐊᑭᓕᖅᓱᐃᕙᒃᑐᓂᒃ ᑐᓴᖁᔨᕗᑦ ᑖᒃᑯᐊ ᐆᒻᒪᖅᑯᑎᓕᕆᔨᒃᑯᑦ ᐊᑭᓕᖅᓱᐃᕙᒃᑐᓂᒃ ᐊᐱᖅᓱᑲᑕᓛᕈᒪᖕᒪᑕ ᐅᖃᓘᑎᒃᑯᑦ ᐅᑐᐱᕆ 17, 2016-ᒥ ᓄᕕᐱᕆ 5, 2016-ᒧᑦ. ᐊᐱᖅᓱᖅᑕᐅᖃᑦᑕᓛᖅᑐᑦ ᐃᒻᒪᖄ 5 ᒥᓂᑦ−ᒥ 10-ᒥᓂᑦᒧᑦ ᑎᑭᓪᓗᒍ ᐊᑕᖏᕐᓗᒋᑦ ᐊᐱᖅᓱᕈᑕᐅᔪᑦ.

ᐆᒻᒪᖅᑯᑎᓂᒃ ᐊᑭᓕᖅᓱᐃᔨᑦ ᑎᓕᐅᖅᑕᐅᕗᑦ ᐅᖃᐅᓯᒃᓴᒥᓂᒃ ᐅᖃᕈᓐᓇᖁᔭᐅᓪᓗᑎᒃ ᐊᐱᖅᓱᖅᑎᓄᑦ ᑭᐅᔾᔪᑕᐅᔪᑦ ᐊᑐᖅᑕᐅᖃᑦᑕᓛᕐᒪᑕ ᐃᑲᔫᑕᐅᓗᑎᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓂ ᐱᐅᓯᕚᓪᓕᕈᑕᐅᓗᑎᒃ ᐱᔨᑦᑎᕋᐅᑎᒋᕙᒃᑕᖏᓐᓂᒃ ᐊᑭᓕᖅᓱᐃᕙᒃᑐᓄᑦ.

ᐆᒻᒪᖅᑯᑎᓄᑦ ᐊᑭᓕᖅᓱᐃᕙᒃᑐᑦ ᐊᐱᖅᓱᖅᑕᐅᔪᑦ ᐊᐱᖅᓱᖅᑕᐅᕌᓂᒃᑳᖓᑕ ᐊᑎᖏᑦ ᐃᓕᔭᐅᑲᐅᑎᒋᖃᑦᑕᓛᖅᑐᑦ ᐊᒧᔭᐅᔪᒃᓴᓄᑦ, ᐊᒧᔭᐅᔫᒃ ᒪᕐᕉᒃ ᓵᓚᒃᓴᓛᖅᑑᒃ $500 ᓂᐅᕕᕈᓐᓇᐅᑎᒥᒃ ᓂᐅᕕᖅᑎᒃᑯᓐᓂ ᐅᕝᕙᓘᓐᓃᑦ ᑯᐊᐸᒃᑯᓐᓂ. ᐊᒧᔭᐅᔪᕕᓃᑦ ᑐᓴᖅᑎᑕᐅᓛᖅᑐᑦ ᐅᖃᓗᒡᕕᐅᓗᑎᒃ ᑎᓯᐱᕆ 1, 2016-ᖑᓕᖅᐸᑦ.