Latest News

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᓄᓇᕗᒻᒥᐅᓂᒃ ᐃᖅᑲᐃᓯᒋᐊᕈᒪᕗᑦ ᓄᑭᓪᓚᐅᑎᑦ ᐱᔨᑦᑎᕋᖅᑕᐅᔾᔪᑎᑦ ᐱᓇᔫᑎᖓᓂᒃ ᑐᓂᓯᖁᔭᐅᓪᓗᑎᒃ ᓄᑖᒧᑦ ᓄᑖᙳᕆᐊᖅᓯᒪᔪᒧᓪᓘᓐᓃᑦ ᐱᔨᑦᑎᕋᖅᑕᐅᔾᔪᑎᒧᑦ ᐊᐃᕐᕆᓕ 30, 2021 ᑐᖔᓂ, ᑭᖑᕙᕆᐊᖅᑕᐅᖁᓇᒍ ᐱᔨᑦᑎᕋᖅᑕᐅᔾᔪᑎᖓ ᐊᑦᑕᑕᕈᑎᖓᓄᑦ.

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᓯᕗᓂᐊᒍᑦ ᑐᓴᖅᑎᑦᑎᔾᔪᑎᒥᒃ ᐱᔭᕆᐊᖃᖅᐳᑦ ᖃᖓ ᐱᔨᑦᑎᕋᐅᑎᖓ ᐊᑦᑕᑕᖅᑎᑕᐅᓂᐊᕐᒪᖔᑦ ᐸᕐᓇᐃᔭᕆᐊᖃᕐᓂᖏᓐᓄᑦ ᐊᒻᒪ ᑎᑭᓴᐃᔭᕆᐊᖃᖅᖢᑎᒃ ᓱᓇᒃᑯᑖᓂᒃ.  ᐊᑦᑕᑕᖅᑎᑕᐅᓂᐊᓕᓵᖅᑐᑦ ᐃᒪᐃᓕᐅᖅᑕᐅᓇᔭᖅᑐᑦ ᓄᑖᓂᒃ ᓇᑉᐸᖅᑯᑎᓂᒃ ᐃᓕᐅᖅᑲᐃᓗᑎᒃ ᓯᓚ ᓂᒡᓚᓱᓗᐊᕈᓐᓃᖅᐸᑦ ᒪᓂᕋᕐᓗ ᐊᐅᒃᐸᓪᓕᐊᓕᖅᐸᑦ. ᐊᖏᓂᖅᓴᑦ ᐱᓕᕆᐊᒃᓴᑦ ᐅᒥᐊᕐᔪᐊᒃᑰᕆᐊᖃᖅᐳᑦ ᐱᖁᑎᖏᑦ, ᐊᑭᓕᖅᓱᐃᕙᒃᑐᑦ ᐱᓇᔫᑎᒥᓂᒃ ᑐᓂᓯᖃᑦᑕᖁᔭᐅᕗᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᐊᕐᕌᒍ ᐊᑕᐅᓯᖅ ᓯᕗᓂᐊᒍᑦ ᐊᑦᑕᑕᖅᑎᑕᐅᕝᕕᒋᓂᐊᕋᓱᒋᔭᖓᑕ ᐅᓪᓗᖓᓂ.

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖓᑦ ᑲᑎᒪᔨᒃᓴᓄᑦ ᐱᓇᔫᑎᓂᒃ ᒫᓐᓇᑯᑦ ᐱᔪᒪᔪᓂᒃ ᐆᒃᑐᕈᓐᓇᖅᓯᓂᕋᐃᔪᑦ. ᑲᑎᒪᔨᙳᖃᑕᐅᔪᑦ ᐊᒃᓱᕉᑎᖃᕐᓂᕐᒥᓂᒃ ᓇᓗᓇᕆᐊᖃᙱᓚᑦ ᑕᐅᑐᙳᐊᒐᙱᑦᑎᒍᑦ, ᐱᔪᒪᓂᖃᕐᓂᒃᑯᑦ, ᓯᕗᓕᖅᑎᐅᔪᓐᓇᖃᑦᑕᕐᓗᑎᒡᓗ ᐱᓕᕆᐊᖑᔭᕆᐊᓕᖕᓄᑦ ᐃᑲᔫᑎᖃᕈᓐᓇᕐᓂᐊᕐᒪᑕ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᓄᑦ.

ᐱᓕᕆᐊᖃᓚᐅᖅᓯᒪᓂᓖᑦ ᖃᐅᔨᒪᓂᖃᑦᑎᐊᖅᑐᓪᓘᓃᑦ ᐃᓱᒪᒃᓴᖅᓯᐊᖑᓪᓚᕆᒐᔭᖅᑐᑦ ᐆᒻᒪᖁᑎᓕᕆᓂᕐᒥᒃ ᐱᓕᕆᐊᖃᖃᑕᐅᓚᐅᖅᓯᒪᒃᐸᑕ. ᖃᐅᔨᒪᓂᖃᕐᓂᖅᑕᐅᖅ ᐃᖅᑲᓇᐃᔭᖅᑐᓕᕆᓂᕐᒥᒃ, ᓴᓇᔪᓕᕆᔨᒻᒪᕆᐅᓂᕐᒥᒃ, ᒪᓕᒐᓕᕆᓂᕐᒥᒡᓘᓃᑦ ᑕᐅᑐᒃᑕᐅᖕᒥᔪᑦ ᐱᐅᔫᓂᖏᓐᓂᒃ ᐃᑲᔫᑎᖃᕈᓐᓇᕐᓂᖏᓐᓂᒡᓗ. ᓂᕈᐊᖅᑕᐅᔪᑦ ᑎᒃᑯᐊᖅᑕᐅᓯᒪᓕᕐᓂᐊᖅᑐᑦ ᐅᑭᐅᓄᑦ ᐱᖓᓱᓄᑦ.

ᐃᖃᓗᐃᑦ, ᓄᓇᕗᑦ (ᒫᑦᓯ 5, 2021) ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᓴᖅᑭᑦᑎᓚᐅᕐᒪᑕ ᑮᓇᐅᔭᓕᐅᕋᓱᐊᕐᕕᖕᓄᑦ ᐱᓕᕆᕝᕕᐅᔪᓄᓪᓗ ᐆᒻᒪᖅᑯᑎᓕᕆᔨᒃᑯᓐᓂ ᐱᓕᕆᐊᒃᓴᒥᑦ ᐊᒻᒪᓗ ᐱᔪᓐᓇᖅᓯᓪᓗᑎᒃ ᑐᒃᓯᕋᐅᑎᓂᑦ. ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐅᖃᖅᓯᒪᕗᑦ ᑮᓇᐅᔭᓕᐅᕋᓱᒡᕕᖕᓂ ᐱᓕᕆᕝᕕᖕᓂᓪᓗ ᐆᒻᒪᖅᑯᑎᓕᐅᖅᑎᑦ ᐱᓕᕆᐊᖓᑦ ᑮᓇᐅᔭᓕᐅᕋᓱᒃᑎᓂᑦ ᐱᓕᕆᕝᕕᓕᖕᓂᓪᓗ ᐊᑭᓕᖅᓱᐃᕙᒃᑐᓂᒃ ᐆᒻᒪᖅᑯᑎᓕᐅᕈᓐᓇᖅᑎᑦᑎᓂᐊᖅᐳᑦ ᐊᑐᒃᑲᓐᓂᕈᓐᓇᖅᑐᓂᒃ ᐆᒻᒪᖅᑯᑎᓕᕆᔾᔪᑎᓂᒃ ᐊᒻᒪ ᐊᒥᐊᒃᑯᐊᓂᒃ ᓂᐅᕐᕈᑎᖃᖅᐸᒡᓗᑎᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ. ᑮᓇᐅᔭᓕᐅᕋᓱᐊᕐᕕᖕᓄᑦ ᐱᓕᕆᕝᕕᐅᔪᓄᓪᓗ ᐆᒻᒪᖅᑯᑎᓕᕆᔨᒃᑯᓐᓂ ᐱᓕᕆᐊᒃᓴᓕᕆᔨᒃᑯᓐᓄᑦ ᐃᓚᒋᔭᐅᔪᑦ ᐊᑭᓕᖅᑕᐅᓂᐊᖅᐳᑦ ᐆᒻᒪᖅᑯᑎᑐᕈᓯᕐᒥᓄᑦ ᓂᐅᕐᕈᑎᒋᓗᒋᓪᓗ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᐊᑭᖃᖅᑎᒋᓗᒋᑦ ᓇᓕᒧᑦᑐᒥᒃ ᐆᒻᒪᖅᑯᑎᓕᕆᔨᒃᑯᑦ ᐃᒐᓯᐅᑎᑐᕐᓂᕆᔭᖓᓐᓄᒃ ᐊᑐᓗᐊᙱᔾᔪᑎᓄᑦ.

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᒥᒃᓴᐅᑦᑎᓗᑎᒃ ᐊᑭᓕᒐᒃᓴᖅᑖᖅᑎᑦᑎᓂᐊᖅᑐᑦ ᐊᕐᕕᐊᕐᒥ ᐆᒻᒪᖅᑯᑎᓄᑦ ᐊᑭᓕᖅᓱᐃᔨᓄᑦ ᑐᐅᕕᕐᓇᖅᑐᒦᑎᓪᓗᒋᑦ ᓇᓗᓇᐃᖅᑕᐅᓯᒪᓂᖓᓂᒃ ᓄᓇᓕᖕᓂ ᕼᐋᒻᒪᓚᒃᑯᓐᓂ. ᐆᒻᒪᖅᑯᑎᑐᕈᓯᑦ ᖃᐅᔨᓴᕈᑎᑦ ᖃᐅᔨᓴᖅᑕᐅᔾᔮᙱᑦᑐᑦ ᓴᐳᔾᔭᐅᒋᐊᖃᕐᒪᑕ ᐆᒻᒪᖅᑯᑎᓕᕆᔨᒃᑯᑦ ᐃᖅᑲᓇᐃᔭᖅᑎᖏᑕ ᖃᓄᐃᙱᑦᑎᐊᕈᓯᖏᑦ ᐆᒻᒪᖅᑯᑎᓕᕆᔨᒃᑯᑦ ᐊᑦᑕᕐᓇᙱᑦᑐᓂᒃ ᐱᕐᔪᐊᓂᒡᓗ ᐆᒻᒪᖅᑯᑎᖃᖅᑎᑦᑎᒋᐊᖃᖅᑎᓪᓗᒋᑦ.

ᒥᒃᓴᐅᑦᑎᓯᒪᔪᑦ ᐆᒻᒪᖅᑯᑎᓄᑦ ᖃᐅᔨᓴᕈᓯᑦ ᑲᑎᖅᓱᖅᑕᐅᓲᖑᕗᑦ ᐊᑐᖅᑕᐅᓪᓗᑎᒃ ᑕᖅᑭᐅᓚᐅᖅᑐᒥᒃ ᐆᒻᒪᖅᑯᑎᑐᕈᑕᐅᓚᐅᖅᑐᑦ. ᒥᒃᓴᐅᑦᑎᓯᒪᔪᖅ ᐊᑭᑐᓂᖅᓴᐅᑐᐃᓐᓇᕆᐊᖃᖅᐳᑦ ᑐᖓᐅᑦᑎᓯᒪᑐᐃᓐᓇᕆᐊᖃᖅᐳᕐᓘᓐᓃᑦ ᐆᒻᒪᖅᑯᑎᑐᕈᓯᕆᔭᐅᕙᒃᑐᒧᑦ, ᑭᓯᐊᓂ ᐊᔾᔨᒌᙱᓐᓂᖓ ᐋᖅᑭᒋᐊᖅᑕᐅᓛᖅᑐᖅ ᑭᖑᓪᓕᕐᒥ ᑕᖅᑭᒥᒃ ᖃᐅᔨᓴᖅᑕᐅᒋᐊᖃᓕᕐᓂᕐᒥᒃᐸᑕ.

ᐊᑭᓖᔭᖅᑐᖅᐸᒃᑐᑦ ᒪᑐᐊᖅᓯᒪᔭᕆᐊᖃᖅᐳᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐱᔨᑦᑎᕋᖅᑕᐅᕝᕕᖏᑕ ᐊᓪᓚᕝᕕᖏᓐᓂ ᐆᒻᒪᖅᑯᑎᓕᕆᔨᒃᑯᑦ ᐃᖅᑲᓇᐃᔭᖅᑎᖏᑦ ᐊᒻᒪ ᓄᓇᕗᒻᒥ ᓄᓇᓕᖏᑦ ᖃᓄᐃᙱᑦᑐᑦ ᓴᐳᔾᔭᐅᖁᓪᓗᒋᑦ. ᐅᑯᓇᓂ ᐱᔨᑦᑎᕋᖅᑕᐅᕝᕕᖕᓂ ᐊᓪᓚᕝᕕᖃᖅᐳᑦ ᑲᖏᖅᖠᓂᕐᒥ, ᖃᒪᓂ'ᑐᐊᕐᒥ, ᐃᖃᓗᖕᓂ, ᐊᒻᒪ ᐃᖃᓗᒃᑑᑦᑎᐊᕐᒥ ᒪᑐᐃᖓᕙᒃᖢᑎᒡᓗ ᐃᖅᑲᓇᐃᔭᕐᓇᓂ ᐃᑲᕐᕋᓂᑦ (8:30−ᒥᑦ ᐅᓪᓛᒃᑯᑦ 5:00−ᒧᐊᕋᓱᖕᓂᖓᓄᑦ ᐅᓐᓄᒃᓴᒃᑯᑦ ᓄᓇᓕᖕᓂ ᖃᐅᔨᓴᐅᑎᖓ ᒪᓕᒃᖢᒍ).

ᖃᔅᓰᓐᓇᐃᑦ ᐃᓄᐃᑦ ᐃᓯᕈᓐᓇᖅᑐᑦ ᐊᑭᓖᔭᖅᑐᖅᑐᑦ ᐊᑕᐅᓯᐊᕐᓗᑎᒃ. ᐊᑭᓕᖅᓱᐃᕙᒃᑐᓕᒫᑦ ᐃᒃᐱᒍᓱᖁᔭᐅᑦᑎᐊᖅᐳᑦ ᐋᓐᓂᐊᖃᕐᓇᙱᑦᑐᓕᕆᔨᑦ ᑭᒡᓕᖃᖅᑎᑕᖏᓐᓂᒃ 2 ᒦᑕᓂᒃ ᐅᖓᓯᒌᒃᑎᒋᕙᒡᓗᑎᒃ (6−ᓂᒃ ᐃᓯᒃᑲᓂᒃ) ᐃᓅᖃᑎᒥᓂᒃ ᒪᑐᐊᖅᓯᒪᕙᒡᓗᑎᒡᓗ.

ᒪᑐᐃᓕᓵᖅᑎᓪᓗᒍ ᐃᑲᕐᕋᖏᓐᓂ ᐃᖅᑲᓇᐃᔭᕐᓇᓂ ᐃᓐᓇᕐᓄᑦ ᑐᕌᖓᑎᑕᐅᓂᐊᖅᑐᑦ ᐊᓯᖏᓐᓄᓪᓗ ᐊᒃᑐᖅᑕᐅᓴᕋᐃᑦᑐᓄᑦ.

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐃᖅᑲᐃᓯᒋᐊᕈᒪᕗᑦ ᓄᓇᕗᒻᒥᐅᓂᑦ ᐅᔾᔨᖅᓱᑦᑎᐊᖃᑦᑕᖁᔨᓪᓗᑎᒃ ᓇᑉᐸᖅᑯᑏᑦ ᓴᕕᒐᐅᔭᓪᓗ ᖃᓂᒋᔮᒍᑦ, ᐱᓗᐊᖅᑐᒥ ᐃᖏᕐᕋᔾᔪᑎᖕᒨᖅᐸᒃᑐᓄᑦ (ᑎᓴᒪᓕᖕᓄᑦ ᖃᒧᑕᐅᔭᓄᓪᓗ). ᐅᑯᐊ ᐳᐃᒍᖅᑕᐃᓕᓗᒋᑦ ᖃᒥᑦᑐᖃᖁᓇᒍ, ᐋᓐᓂᕐᔪᐊᖅᑐᖃᖁᓇᒍ, ᐃᓅᔪᓐᓃᖅᑐᖃᖁᓇᒍᓘᓐᓃᑦ:

·         ᐳᐃᒍᖅᑕᐃᓕᒋᑦ ᐱᖓᓱᑦ ᒦᑕᓂᒃ ᐅᖓᓯᒋᔭᕆᐊᖃᕋᕕᒋᑦ ᓴᕕᒐᐅᔭᐃᑦ.

·         ᐱᖁᑎᑦ ᐊᑐᖅᑕᐅᔪᑦ ᓇᑉᐸᖅᑯᑎᓄᑦ ᓲᕐᓗ ᓴᕕᒐᐅᔭᑦ ᑭᓱᓪᓘᓐᓃᑦ ᐊᐳᑎᒧᑦ ᓴᐅᓯᒪᑐᐃᓐᓇᕆᐊᖃᕐᒪᑕ. ᓇᑉᐸᖅᑯᑎᑦ ᐅᖓᓯᒋᓗᒋᑦ  ᐃᖏᕐᕋᕙᒡᓗᓯ. ᐊᖁᑉᐸᒃᑐᓄᑦ ᑕᑯᔭᐅᔪᓐᓇᖁᓪᓗᒋᑦ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐃᓕᐅᖅᑲᐃᓚᐅᖅᐳᑦ ᑕᖅᓵᖅᑐᓂᑦ ᓴᕕᒐᐅᔭᕐᓄᑦ ᐊᑐᖅᑕᐅᒐᔪᒃᑐᑎᒍᑦ ᐊᖅᑯᑎᒃᑯᑦ.

ᖁᓪᓕᒃᑯᑦ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐊᑭᓕᖅᓱᐃᔨᓄᑦ ᒪᑐᐃᒃᑲᓐᓂᕐᓂᐊᓕᖅᐳᖅ ᖃᒪᓂ'ᑐᐊᕐᒥ, ᐃᖃᓗᖕᓂ, ᐊᒻᒪᓗ ᐃᖃᓗᒃᑑᑦᑎᐊᕐᒥ ᐱᖓᔪᐊᓐᓂ, ᑎᓯᐱᕆ 2-ᒥ, ᖃᐅᑕᒫᑦ ᐱᓕᕆᐊᕆᕙᒃᑕᒥᓄᑦ ᐃᑲᕐᕋᓄᑦ (8:30−ᒥᑦ ᐅᓪᓛᒥᑦ 5−ᒧᑦ ᐅᓐᓄᖕᒧᑦ ᓄᓇᓕᖕᒥᐅᑦ ᖃᐅᔨᓴᐅᑎᖓᑎᒍᑦ).

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐅᖓᕙᕆᐊᖅᑎᑦᑎᓂᐊᖅᐳᑦ ᒪᑐᐃᖅᓯᒃᑲᓐᓂᕐᓂᕐᒥᒃ ᑲᖏᖅᖠᓂᕐᒥᐅᑦ ᐊᑭᓕᖅᓱᐃᕙᒃᑐᓄᑦ ᑲᒪᒋᔭᖃᕐᓂᕐᒧᑦ ᑎᑎᕋᕐᕕᖓᑦ ᐅᕗᖓ ᐅᓪᓗᒧᑦ, ᑎᓯᐱᕆ 7−ᒥ, ᐃᑲᕐᕋᓄᑦ ᐊᐅᓚᓂᕆᕙᒃᑕᒥᓄᑦ. ᑕᒪᓐᓇ ᐅᖓᕙᕆᐊᖅᑎᑦᑎᓂᖅ ᐱᕕᖃᖅᑎᑦᑎᓂᐊᖅᐳᖅ ᑖᔅᓱᒥᖓ ᑎᒥᖁᑎᒋᔭᐅᔪᒥᒃ ᐱᔭᕇᖅᓯᔪᓐᓇᕐᓂᕐᒥᒃ ᓴᓗᒻᒪᖅᓴᐃᒃᑲᓐᓂᕐᓂᕐᒧᑦ ᐊᑐᖅᑕᐅᓇᔭᖅᑐᓂᒃ ᐃᑲᔪᕐᓂᐊᕐᓗᓂ ᓴᐳᔾᔨᓯᒪᓂᕐᒥᒃ ᖃᓄᐃᙱᑦᑎᐊᕈᓐᓇᕐᓂᖏᓐᓂᒃ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖᑕ ᐃᖅᑲᓇᐃᔭᖅᑎᖏᑦ ᓄᓇᓕᖕᒥᐅᓪᓗ.

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᐊᑭᓕᖅᓱᐃᕙᒃᑐᓂᒃ ᑐᓴᐅᒪᖁᔨᕗᑦ ᐆᒻᒪᖅᑯᑎᑦ ᐊᐅᓚᓂᕆᔭᖏᑕ ᓇᓗᓇᐃᒃᑯᑕᖏᑦ ᖃᐅᔨᓴᖅᑕᐅᑲᑕᔾᔮᙱᒻᒪᑕ ᓄᕕᐱᕆ−ᒥ ᐊᑭᓕᒐᒃᓴᓂᒃ ᐱᔾᔪᑕᐅᓪᓗᓂ ᓄᓇᕘᓕᒫᒥ ᓄᕙᒡᔪᐊᕐᓇᖅ-19−ᒧᑦ ᑭᒡᓕᒋᑎᑕᐅᔪᓂᒃ. ᓴᐳᑎᓗᒋᑦ ᖃᓄᐃᙱᑦᑎᐊᕈᓯᖏᑦ ᖁᓪᓕᖅ ᐆᒻᒪᖅᑯᑎᓕᕆᔨᒃᑯᓐᓄᑦ ᐃᖅᑲᓇᐃᔭᖅᑎᑦ ᓄᓇᕗᒻᒥ ᓄᓇᓕᖕᓂ ᓯᕗᓪᓕᐅᔾᔭᐅᒋᐊᖃᕐᒪᑕ ᐆᒻᒪᖅᑯᑎᓕᕆᔨᒃᑯᑦ ᐊᑦᑕᕐᓇᙱᑦᑐᓂᒃ ᐱᕐᔪᐊᓂᒡᓗ ᐆᒻᒪᖅᑯᑎᖃᖅᑎᑦᑎᒋᐊᖃᖅᑎᓪᓗᒋᑦ.

ᐆᒻᒪᖅᑯᑎᓄᑦ ᐊᑭᓕᒐᒃᓴᑦ ᒥᒃᓴᐅᑦᑎᓯᒪᓂᐊᖅᑐᑦ ᓄᓇᓕᓕᒫᓂᒃ ᑭᓯᐊᓂ ᐃᖃᓗᖕᒥᐅᑦ, ᐊᓯᖏᓐᓂᒡᓕ ᐆᒻᒪᖅᑯᑎᓄᑦ ᖃᐅᔨᓴᕈᑎᖃᕐᒪᑕ. ᐊᓯᖏᑦ ᐆᒻᒪᖅᑯᑎᓄᑦ ᖃᐅᔨᓴᕈᑎᑦ ᖃᕆᑕᐅᔭᒃᑯᑦ ᑐᑭᓯᒋᐊᒐᒃᓴᓂᒃ ᐊᐅᓪᓚᖅᑎᑦᑎᓲᖑᕗᑦ, ᐅᐸᑲᑕᓪᓚᑦᑖᕐᓗᒋᑦ ᖃᐅᔨᓴᕆᐊᖃᖅᐸᙱᑦᑐᑦ.

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᖃᐅᔨᒪᖁᔨᕗᑦ ᓴᓂᕋᔭᖕᒥᐅᓂᒃ ᖃᒥᙵᑎᑦᓯᓪᓛᖅᒪᑕ ᑖᓐᓇ ᐸᕐᓇᑕᐅᓯᒪᔪᖅ ᓯᕙᑖᕐᕕᖕᒥ, ᓄᕕᐱᕆ 21 ᐊᒻᒪ ᓈᑦᓰᖑᔭᒥ, ᓄᕕᐱᕆ 22, ᐱᒋᐊᕐᓗᓂ ᐅᓪᓛᒃᑯᑦ 8-ᒥᑦ 11-ᒧᑦ.

ᑖᒃᑯᐊ ᖃᒥᙶᑲᐃᓐᓇᕆᐊᖃᕐᒪᑕ ᓄᑖᙳᕆᐊᖅᓯᔪᒪᓪᓗᑎᒃ ᐆᒻᒪᖅᑯᑎᖃᕈᑎᖏᓐᓂᒃ ᐊᒻᒪ ᓄᓇᓕᖕᒥᐅᑦ ᖃᒥᖃᑦᑕᙱᓐᓂᖅᓴᓂᒃ ᐆᒻᒪᖁᑎᖃᕐᓂᐊᕐᒪᑕ.

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᖁᔭᓕᕗᑦ ᑐᑭᓯᐅᒪᔪᓐᓇᕐᒪᑕ ᒪᒥᐊᑉᐳᓪᓗ ᐊᑲᐅᙱᓕᐅᕈᑕᐅᑐᐃᓐᓇᕆᐊᖃᖅᐸᑦ ᖃᒥᙶᖅᑎᓪᓗᒋᑦ.

###

ᑐᓴᒐᒃᓴᓕᐅᖅᑎᓄᑦ ᑐᑭᓯᒋᐊᕐᕕᒃ:

ᕈᓃ ᐳᓲ

ᐊᐅᓚᑦᑎᔨᐅᓚᐅᑲᒃᑐᖅ, ᑐᓴᐅᒪᔪᓕᕆᔨᒃᑯᓐᓄᑦ

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ

(867) 979-7524
rboucher@qec.nu.ca

ᖁᓪᓕᒃᑯᑦ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᑐᓴᖅᑎᑦᑎᔪᒪᕗᑦ ᓄᓇᕗᒻᒥᐅᓂᒃ ᑕᒪᒃᑯᐊ ᐱᔨᑦᑎᕋᕐᕕᒋᕙᒃᑕᒥᓄᑦ ᑲᒪᒋᔭᖃᕐᕕᖏᑦ ᑎᑎᕋᕐᕖᑦ ᑕᒫᓂᓕᒫᖅ ᐅᑭᐅᖅᑕᖅᑐᒥ ᒪᑐᓯᒪᓂᐊᕐᓂᖏᓐᓂᑦ ᑐᓴᖅᑎᑦᑎᔪᖃᒃᑲᓐᓂᓚᐅᙱᓐᓂᖓᓂ. 

ᑯᐊᐳᕇᓴᒃᑯᑦ ᐊᑦᑕᕐᓇᙱᑦᑐᒥᒃ ᐊᑐᑦᑎᐊᕈᓐᓇᖅᑐᒥᒡᓗ ᐆᒻᒪᖅᑯᑎᖃᖅᑎᑦᑎᔪᒪᓪᓚᑦᑖᖅᐳᑦᓄᓇᕗᒻᒥᐅᓕᒫᓄᑦ ᐃᑲᔪᕐᓗᑎᒡᓗ ᓄᕙᒡᔪᐊᕐᓇᖅ-19−ᒥ ᐊᐃᑦᑐᕐᓗᐃᓗᐊᖅᑎᑦᑎᑦᑕᐃᓕᒪᔪᑦᓄᓇᓕᖕᓂ. ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑖ ᐊᖑᒻᒪᑏᓐᓇᕐᓂᐊᕐᐳᑦ ᑲᔪᓰᓐᓇᖅᑐᓄᑦ ᐊᓂᒍᖅᑎᓐᓇᓱᒋᐊᖃᖅᐸᒃᑐᓄᑦ ᓄᕙᒡᔪᐊᕐᓇᖅ-19-ᑕᖃᕐᓂᖓᓂ ᓄᓇᕐᔪᐊᓕᒫᒥ.